في هالدنيا في عالمين، وكأنهم مش عايشين على نفس الكوكب

عالم اول.

أطفال قاعدين بيسمعوا أغاني هابطة، بيغرقوا بدموع على كلمات فارغة، وبيفكروا إن الحياة كلها وجع وحب مصطنع ، ودموعهم بتروح عالفاضي، على اشي ما بستاهل، لحن بيروّج لوهم وبيسرق من طفولتهم البراءة.

وعالم ثاني.

غزة، هناك الأطفال ما بيعرفوا الأغاني الهابطة ولا عايشين جو الرومانسية المزيفة ،هناك الطفل بيسمع صوت الصاروخ مش صوت المطرب، بيشوف الدمار مش المسرح، ودمعته بتنزل على بيت ادمر، على أخ راح، على أم مفقودة، دمعة من طفل بغزة تساوي قلوب الدنيا كلها، لأنها دمعة وجع حقيقي وصمود بوجه الموت.

الفرق بين العالمين بيخلّي الواحد يوقف مذهول ،كيف في أطفال بيعيشوا بعالم الترفيه الفارغ، ودموعهم لعبة، وفي أطفال دموعهم شهادة على جريمة؟!

المسؤولية علينا إحنا، بدنا نعلّم ولادنا يفرّقوا بين الدمع الصادق والدمع المزيف، بين الأغنية اللي تضيّعهم والقضية اللي ترفعهم، ولادنا لازم يعرفوا إن العالم مش بس لحن رخيص، العالم كرامة، وغزة مثال.

خلينا نربّي جيل يبكي على فلسطين، مش على أغنية ما إلها قيمة ،جيل يعرف إن الدموع مش موضة، الدموع موقف.